Հայ-ռուսական նոր համաձայնագիր
Ապրիլի 4-ին Մոսկվայում ստորագրվել է համագործակցության համաձայնագիր Հայաստանի Հանրապետության կրթության եւ գիտության նախարարության գիտության պետական կոմիտեի եւ «Նոր տեխնոլոգիաների մշակման եւ առեւտրայնացման կենտրոնի զարգացման հիմնադրամ» ոչ առեւտրային կազմակերպության («Սկոլկովո» հիմնադրամ) միջեւ:
Հայկական կողմից համաձայնագիրն ստորագրել է ԳՊԿ նախագահ Ս. Հարությունյանը, ռուսական կողմից՝ Հիմնադրամի իրավական եւ վարչական հարցերով ավագ փոխնախագահ Իգոր Դրոզդովը:
Համաձայնագրով նախատեսվում է ընդլայնել «Սկոլկովո» հիմնադրամի եւ հայ գիտնականների ու գործարարների միջեւ համագործակցությունը, որը կզարգանա հետեւյալ ուղղություններով՝ էներգետիկա եւ էներգամատակարարում, բժշկություն, բժշկական տեխնիկա, բժշկակենսաբանական եւ արդյունաբերական կենսատեխնոլոգիաներ, կենսաինֆորմատիկա եւ դեղագործություն, տեղեկատվական-հաղորդակցական եւ ավիատիեզերական տեխնոլոգիաներ, միջուկային տեխնոլոգիաներ:
Նախատեսվում է աջակցել ՀՀ-ում եւ ՌԴ-ում բարձրտեխնոլոգիական համատեղ ձեռնարկությունների ստեղծմանը, «Սկոլկովո» նորարական կենտրոնի տարածքում ՀՀ կորպորատիվ հետազոտական կենտրոնների, կազմակերպությունների եւ ձեռնարկությունների տեղակայմանը, համատեղ միջոցառումների կազմակերպմանն ու աջակցմանը եւ այլն:
Համագործակցության ժամանակ առաջնահերթությունը կտրվի մինչեւ 2020 թվականը ԱՊՀ մասնակից պետությունների նորարարական համագործակցության միջպետական ծրագրի եւ այլ միջպետական ծրագրերի շրջանակներում իրականացվող նախագծերին:
Մոսկվայում պարոն Հարությունյանը հանդիպումներ է ունեցել նաեւ հիմնադրամի փորձագիտական վարչության ղեկավար Ջենիֆեր Տրոլեւիչի եւ բաժանմունքի ղեկավար, տիեզերագնաց Սերգեյ Ժուկովի հետ:
Տեղեկատվության եւ հասարակայնության հետ կապերի բաժին