Հուշագրեր՝ «ՔԵՆԴԼ» ծրագրի շրջանակներում
ՀՀ ԿԳՆ ԳՊԿ նախագահ Ս. Հարությունյանը օգոստոսի 14-27-ը գտնվում էր Եվրոպայում՝ «ՔԵՆԴԼ» նախագծի շրջանակներում բանակցություններ վարելու եւ պայմանագիր կնքելու նպատակով:
Հայկական պատվիրակությունը, Ս. Հարությունյանի գլխավորությամբ, օգոստոսի 14-16-ը Գերմանիայի Դաշնային Հանրապետությունում հանդիպել է «ԴԵԶԻ» (DESY-գերմանական էլեկտրոնային սինքրոտրոն) կենտրոնի ներկայացուցիչների հետ: Քննարկվել են «Քենդլ» նախագծի շրջանակներում հայ եւ գերմանացի գիտնականների համագործակցության հարցեր: Համագործակցությունը ենթադրում է փորձագետների փոխանակում, համատեղ հետազոտությունների իրականացում, երիտասարդ գիտնականների եւ ճարտարագետների համար դասընթացների, գիտաժողովների կազմակերպում: Քննարկումների արդյունքում, օգոստոսի 16-ին կնքվել է «ԴԵԶԻ»-ի եւ ՀՀ ԿԳՆ գիտության պետական կոմիտեի միջեւ մտադրությունների հուշագիր, որով մեկնարկում է 2010 թ. հոկտեմբերի 20-ին «ՔԵՆԴԼ» եւ «ԴԵԶԻ» կենտրոնների միջեւ կնքված մտադրությունների հուշագրով նախատեսված ծրագրի առաջին փուլը:
Օգոստոսի 25-ին ԳՊԿ նախագահը եւ «ՔԵՆԴԼ» ծրագրի տնօրենը մեկնել են Շվեյցարիա՝ հանդիպելու PSI (Պաուլ Շերերի ինստիտուտ) կենտրոնի ներկայացուցիչների հետ: Բարձր գնահատելով PSI-ի եւ հայ գիտնականների միջեւ համագործակցության արդյունավետությունը՝ կենտրոնի ղեկավարությունը կրկին հաստատել է իր մասնակցությունը «ՔԵՆԴԼ» նախագծի իրականացմանը: Հանդիպման արդյունքում PSI-ի եւ Գիտության պետական կոմիտեի միջեւ կնքվել է մտադրությունների հուշագիր:
Գերմանիա եւ Շվեյցարիա գործուղման արդյունքում պայմանավորվածություն է ձեռք բերվել առաջիկա 2-3 տարիների ընթացքում կազմակերպել երիտասարդ մասնագետների վերապատրաստման ծրագրեր վերոնշյալ գիտական կենտրոններում, հայ եւ գերմանացի գիտնականների գիտագործնական հանդիպումներ, բացի այդ, Հայաստանին կհատկացվեն գծային արագացուցչի կառուցման համար անհրաժեշտ որոշ սարքավորումներ:
Նախատեսվում է նաեւ 2012 թվականի գարնանը Հայաստանում կազմակերպել հանդիպում Գերմանիայի եւ Շվեյցարիայի ներկայացուցիչների հետ:
Տեղեկատվության եւ հասարակայնության հետ կապերի բաժին