Հայտարարվել է հայ-գերմանական համատեղ թեմաների աջակցության մրցույթ
Գիտության կոմիտեն հայտարարում է գիտական հետազոտությունների հայ-գերմանական համատեղ թեմաների աջակցության մրցույթ: Սա ՀՀ ԿԳՄՍՆ գիտության կոմիտեի և ԳԴՀ կրթության և հետազոտությունների դաշնային նախարարության միջև 2011 թ. օգոստոսի 24-ին ստորագրված «Գիտության և տեխնոլոգիաների ոլորտներում համագործակցության զարգացման մասին» մտադրությունների հուշագրի շրջանակներում անցկացվող երրորդ մրցույթն է, որի նպատակն է խթանել երկու երկրների գիտական կազմակերպությունների և բուհերի միջև համագործակցային կապերը՝ երկկողմ հետաքրքրություն ներկայացնող գիտական նախագծերի իրականացմանն աջակցություն տրամադրելու միջոցով, օժանդակել երիտասարդ գիտնականների շարժունության բարձրացմանը, ինչպես նաև հիմքեր ստեղծել համատեղ գիտական խմբերի՝ ԵՄ շրջանակային ծրագրերին մասնակցության համար: Հայտերի գիտական փորձաքննության ընթացքում, ի թիվս այլ չափանիշների, գնահատվելու են ԵՄ «Հորիզոն Եվրոպա» հետազոտությունների և նորարարությունների շրջանակային ծրագրի ուղղություններին համապատասխանությունը և վերջինիս մասնակցելու հեռանկարները:
Հայտերը կարող են ներկայացվել հետևյալ թեմատիկ ուղղություններով՝
- Տեղեկատվական և հաղորդակցական տեխնոլոգիաներ,
- Կայուն գյուղատնտեսություն (ներառյալ սննդի տեխնոլոգիաներ և սննդի անվտանգություն),
- Կենսատեխնոլոգիա և կիրառական նշանակության բժշկագիտական հետազոտություններ,
- Ճգնաժամերի կանխմանը և ճգնաժամերի կառավարմանը նվիրված հետազոտություններ (ներառյալ՝ սոցիալական, առողջապահական և տնտեսական հարցադրումներ, ռիսկերի գնահատում և ռիսկերի կառավարում),
- Հասարակագիտական և հումանիտար հետազոտություններ՝ միջգիտակարգային հետազոտություններ:
Մրցույթին կարող են ներկայացվել նաև հայտեր, որոնք համապատասխանում են «Եվրոպական Կանաչ գործարք» նախագծի առաջնահերթություններին (նախագծի վերաբերյալ մանրամասն տեղեկատվություն կարելի է ստանալ https://ec.europa.eu/info/strategy/priorities-2019-2024/european-green-deal_en կայքէջից):
Մրցույթին մասնակցության գիտական նախագծերի հայտերը ներկայացվում են ՀՀ և ԳԴՀ գիտնականներից կազմված խմբերի կողմից: Հայաստանյան խմբում կարող են ընդգրկվել 4-ից 10 անդամներ: Նախատեսվում է տրամադրել 12 կամ 24 ամիս տևողությամբ մինչև տասը դրամաշնորհ:
Հայտերն ընդունվում են Գիտության կոմիտեի հայտերի և հաշվետվությունների առցանց համակարգի միջոցով (https://grants.scs.am)՝ մինչև 2021 թ. օգոստոսի 31-ը ներառյալ: